पत्रकार महासंघलाई नयाँ नीति ल्याउन सुझाव

सुरक्षाका लागि पत्रकार महासंघले जनता गुहार्ने - मिसन टोली नेपालगन्ज,
माघ १९ - बाँकेका सञ्चारकर्मीले डर, धम्की र त्रासले काम गर्न गाह्रो भएकाले सुरक्षित वातावरणका लागि अगुवाई गर्न पत्रकार महासंघलाई आग्रह गरेका छन्। तराईका जिल्लामा पत्रकारको अवस्था अध्ययन गर्न नेपालगन्ज आइपुगेको पत्रकार महासंघको मिसन टोलीसँग आइतबार बाँकेका पत्रकारले विगतको हिसांत्मक द्वन्द्वको भन्दा धेरै बढी जोखिम र असुरक्षित अवस्था रहेको बताएका थिए ।विगतमा सन्तुलन मिलाएर समाचार लेख्दा ज्यान खतरामा नहोला भन्ने लाग्थ्यो, अहिले त चोर अपराधी सबै गिरोहसँग बराबर सम्बन्ध बनाउन नसकेमा बाँच्न गाह्रो हुने अवस्था छ- बिबिसीका संवाददाता नेत्र केसीले भने ।पत्रकार महासंघले ठोस नीति बनाएर अगाडि बढ्नुपर्ने उनको सुझाव थियो ।सहभागी संचारकर्मीले पत्रकारको आचारसंहिता पालना नगर्नेलाई कारबाही गरिनुपर्ने माग पनि उठाएका थिए । महासंघले आन्दोलनलाई सम्झौतामा टुंग्याएर पत्रकारका हत्यारालाई कारबाही गराउन नसकेकाले पत्रकार हत्याका घटना दाहोरिराखेको सहभागीले बताए । वीरेन्द्र साहका हत्यारा जे पी जोशी र उमा सिंहलगायतका पत्रकारका हत्यारालाई कारबाही नगरुन्जेल महासंघले आन्दोलन रोक्न नहुने सुझाव संचारकर्मीले मिसन टोलीसमक्ष राखेका थिए।महिला पत्रकारहरुले उमा सिंहको हत्यापछि परिवारका मान्छे पनि डराएकाले पेशा छोड्नसमेत दबाव दिन थालेको बताएका थिए ।राति अबेरसम्म कार्यालयमा काम सकेर घर फर्कने बेला दुर्व्यवहार खेप्नुपरेको उनीहरुको भनाइ थियो। मिसन टोलीसँग धम्की र जोखिमका कारण कतिपय समाचार लेख्न र बजाउन नसकेको पीडा पनि संचारकर्मीले राखेका थिए ।प्रहरी प्रशासन पत्रकारको सुरक्षाप्रति गम्भीर नहरको सहभागीले बताए ।कन्चनपुर र बर्दियाको भ्रमणपछि टोली बाँके आएको हो । टोलीका संयोजक शिव गाउँलेले अन्तिममा पत्रकार महासंघले सुरक्षाका लागि जनता गुहार्नुपर्ने बताएका छन ।हामी जनताका लागि सूचना पस्कने हो, अन्तिममा जनतालाई नै गुहार्नपर्छ, उनले भने- आपसी एकतालाई बलियो बनाएर पत्रकार अगाडि बढ्नुपर्छ ।मधेसी समाजबाट महिला पत्रकार भएर समाजका विकृति विसंगति बाहिर ल्याउन थालेका कारण उमा सिहंको हत्या भएको उनले बताए । परिवारिक कारण र आर्थिक आर्जनका लागि राजनीतिक शक्ति दुरुपयोग भएर उनको हत्या भएको आफूले बुझेको उनले बताए ।टोलीले आइतबार नै प्रशासनसँग पनि छलफल गरेको जनाएको छ ।