´…आफै गएर हान्दिउँजस्तो लाग्छ´

काठमाडौं, फागुन २४ - दशरथ रंगशालामा लामो समयपछि अन्तर्राष्ट्रिय स्तरको फुटबल हुँदा स्टार मिडफिल्डर नीराजन खड्कालाई चोटले प्यारापिटमा सीमित पारेको छ। लेफ्ट विङ्गस र सेन्ट्रल मिडफिल्डमा जमेर खेल्ने खुबी भएका नीराजन दायाँ घुडाको जोर्नीमा लागेको गहिरो चोटका कारण आराममा छन्। प्रथम प्रधानमन्त्री कप अन्तर्राष्ट्रिय आमन्त्रण फुटबल प्रतियोगिताका लागि नेपालका दुई टिम छानिँदा पनि नीराजन चोटका कारण उपलव्ध हुन सकेनन्। प्रतियोगितामा नेपाल नीलोले दुई तथा रातोले एक खेल खेलिसकेका छन्। नीलो पहिलो खेलमा श्रीलंकाको राष्ट्रिय टिमसँग ३-२ ले पराजित भएको थियो भने शनिबार थाइल्यान्डको जे डब्लू क्लबसँग १-१ को बराबरीमा सीमित भयो। जसका कारण नीलोको सेमिफाइनल पुग्ने सम्भावना गणितमा मात्र बाँकी छ। दुवै खेलमा अग्रता लिए पनि नीलोले त्यसलाई जोगाउन सफल भएन। यसैगरी रातो पनि पहिला गोल गरेर बंगलादेशको आरामबाग क्लबसँग १-१ को बराबरीमा रोकिएको थियो। बराबरीपछि रातोको पनि सेमिफाइनल प्रवेश सम्भावना कठिन बनेको छ।
घाइते नीराजनले नेपालका सबै म्याच रंगशालामा बसेर हेरे। घरेलु मैदानमा नेपालका दुवै टिम कमजोर रुपमा प्रस्तुत हुँदा नीराजनको फुटबल मन थामिनसक्नु गरी उचालिन्छ। प्यारापिटमा घाइते खुट्टा पनि सलबलाउन थाल्छ। भन्छन्- ´साथीहरुले नसक्दा आफै गएर हान्दिउँजस्तो लाग्छ। खुट्टा चिलाएर आउँछ। म भएको भए पक्कै जिताउँथे जस्तो लाग्छ।´ नीराजनको विचारमा नेपाली टिममा पर्याप्त प्रतिभा भए पनि स्पिड र स्टामिनाको कमी देखियो। लामो समयसम्म देशमा घरेलु फुटबल नहँुदा खेलाडीमा फिटनेसको कमी हुनु स्वभाविक ठान्छन् उनी। ´जिल्लाका प्रतियोगिताबाहेक खेल्नै पाएको छैन। लिग नभएपछि फिटनेसमा असर परेको हो´ -उनले प्यारापिटमा खेल हेर्दै गर्दा दैनिकी डटकमसँग भने।
नेपाली फुटबलका प्रतिभावान् मिडफिल्डर नीराजनको आउँदो एक महिनासम्म ठीक भइसक्ने अपेक्षा छ। चैत दोस्रो साता काठमाडौंमा हुने एएफसी च्यालेन्ज कपको छनोट चरण उनको लक्ष्य हो। ´च्यालेन्ज कप नसके पनि लिगचाहिँ पक्कै खेल्छु´- उनको विश्वास छ। नेपाली फुटबलमा दुई वर्षदेखि रहेको विवाद साम्य भएपछि चैत २२ देखि ए डिभिजन लिग गर्ने घोषणा भएको छ। अखिल नेपाल फुटबल संघ एन्फा र त्यसविरुद्ध आन्दोलनरत् नेपाल फुटबल संघ नेफा बीच मंसिर २२ मा सहमति भएको थियो। विवादका कारण २०६३ पछि नेपालमा ए डिभिजन लिग हुन सकेको छैन।